بـسم الله الـرحمن الـرحيم
السلام عليكم,,,
اللـه يـذكرك بالـخير يا أبو صقر, يـقول إن في الـحرب الأيرانية الـعراقية, حـسب عدد الـقتلى إلي إدعـت حكومة صدام إنها قتلتهم, طـعلوا أزيد من عدد الـشعب الأيراني!
سـبحان اللـه, ما أقـبح هؤلاء الـزعماء, الله خاسف بـخلقتهم, لا في واحد منهم حليو يفتح الـنفس, و لا في واحد منهم يعرف يفكر عدل, أقدر أقول بصريح العبارة إن مخهم بـين رجايلهم ” إن تواجـد شيء هناك “!
صدق عادل إمام مات؟!
يلعن أبو الـحنية إلي في الـرؤساء الـعرب!
يـقول لك من سمعوا إشاعة إن عادل إمام مات, كلهم إتصلوا له, واحد ورى الثاني, إلي يتطمن عليه, و إليه متصل يصيح, و مو بعيدة بعضهم فكر ينزل الـعلم 3 أيام حداد على روحه.
ما سـمعتون؟ بـوش غص بـبسكوتة!
حالة إستنفار إعلامية, الـصحف و المجلات تبـحث عن الـشركة الـمنتجة للـبسكويت, الـكونقرس يناقش منع تداول الـبسكويت في أمريكا, و الـحكام الـعرب يـنصحون بالـبخصم… ويش السالفة؟, الـسالفة صارت في 2002, بـوش غص بـبسكوتة!
الـعلاقات الـمصرية الـسورية تزداد تـدهوراً!
ما دريتون؟
نقابة الـممثلين الـمصريين متهاوشة ويه نقابة الممثلين السوريين, و في إحتمال الأمر يتـطور إلى حرب, و إحتمال بـعد تنقطع العلاقات, و حتى الدول العربية يـمكن تسوي تدخل سريع و تصلح بينهم.
لويش عاد؟
جمال سليمان ممثل في مسلسل مصري و ماخذ البطولة!
بـــــــــــــــــــــــــــــــــكرة إجازة!!!!!!!!
ويش تقول؟
بكرة إجازة؟
لويش, ويش صاير..
مادري, بــس واحد من الحكام مـنطفي!
مو مهم ويش اسمه, مو مهم جم باق, مو مهم جم حكم, مو مهم من وينه, كله على بعضه مو مهم, الـحمار يـنولد حمار, و الـحاكم يـنولد حاكم, لا الحمير خلصت و لا الحكام خلصت, الـحمير منها فوايد, و الـحكام فايدتهم في موتتهم!
يـقول لك في حرية صحافة…
إيه فيه..
تـقدر تنتقد النواب, تقدر تنتقد الوزراء, تقدر تحط على المدراء و الوكلاء, تقدر تقول في فساد, تقدر تقول في بوق, بس صراحة مو كل شيء تقدر تقوله, يعني مثلاً ما تقدر تقول إن رئيس الوزراء تسلف, أو الملك أخذ, لكن تقدر تحط صورهم في الصفحة الأولى و جم أقرع يحب خشومهم!
طـلعـــــــــــت وثيقة بيتنا
مـسكينة يا حكومة…
مافي وقت, خمس سنوات وثيقة بيتنا تنتظر توقيع الملك, بيتنا إلي أبويي خاس و هو يبني فيه, و دفع دم قلبه, و ما قصرت وياه الحكومة, تـصدقون من زود طيبتها هالحكومة كتبت لـه في الـوثيقة ” هبة من الملك “!
مـعونة الـغلاء!
صـدق أنتون يالـبحرينين عايشين…
يقولون نزلوا ليكم معونة بدل غلاء 50 دينار…
إيه نزلوها… مثل ما نزلها الوزير في كـشمة الأدب ” فتحة الحمام العربي ” و نـسى يـهد السيفون عليها!
تـصدقون هالأسبوع صارت تفجيرات في غالبية المناطق الـعربية و الأسلامية الـساخنة, و محد عطاها وجه!
تـصدقون فـي نفـس الأسبوع إلي غص فيه بوش, إستشهد 18 شخص في يوم واحد في فلسطين, و الخبر محد عطاه وجه!
الـواحد مـو تـنبط جبده لـين يشوف الدول تتهاوش على مسلسلات و ممثلين قرعان!
الـواحد ما يدري هـو يفرح لأن مات ظالم, لو لأن عطونا إجازة لأنه إنطفى لا بارك الله فيه و لا في إلي جابه!
يـقولون إن فـي حرية صحافة, و الـجريدة ما تـقدر تكتب كلمة ” البندر “!
هبة؟ لا بارك الله فيها من حكومة خايسة, الواحد يتعب و يشقى و بعدين يقولون هبة! باقي يمنون علينا بعد!
معونة غلاء ها؟ مادري هالمعونة للـمواطن, لو هي إعانة للـتجار علشان يحصلون عذر يخليهم يرفعون السعر!
حلو الموضوع،
عجبتني طريقة الكتابة،
يعطيك العافية..
وهالـ 50 دينار ما نزلوها للكل،
الوالد مسكين تعب وهو يجيّك الأكاونت ماله في البنك،
أقول ليه: نزلوها ليك أبويي؟
يقول: لا، شكله بو علي شفا عليها..!!
هيثم… الدنيا ما تسوى…
أحسن شي، تتبع المثل الشعبي المعروف و الرائج و المتبع و المطبق و الرائع و القائل “طنش تعش تنــتعــتعش عش”
و على قولة أم هلال،
“أضرب على الهريس!!!!!”
صدق صار خاطري في هريس! 
مع “التهية”
أهلا أخي chucky
شكراً جزيلاً…
فعلاً.. الظاهر أبو علاي شفا عليها السرسري
القسمي..
المشكلة الواحد تلوع جبده من هالأشكال, غصب عنه يكتب عنها, ما يقدر يطنشهم الأثوار